ब्रेकिंग

महाराष्ट्र

फडणवीस-राज ठाकरे यांच्यात बैठक

Wrutuja pandharpure
13 Jun 2025

उद्धव ठाकरेंसोबतच्या संभाव्य युतीला ब्रेक?

मुंबई, (प्रतिनिधी) : आगामी स्थानिक स्वराज्य संस्था निवडणुकीच्या पार्श्वभूमीवर उद्धव आणि राज हे ठाकरे बंधू एकत्र येण्याची चर्चा सुरु असताना मुख्यमंत्री देवेंद्र फडणवीस आणि महाराष्ट्र नवनिर्माण सेनेचे अध्यक्ष राज ठाकरे यांच्यात गुरुवारी वांद्रे येथील ’ताज लँडस एंड’ या पंचतारांकित हॉटेलमध्ये बैठक झाली. दोघांमधील बैठकीत झालेल्या चर्चेचा अधिकृत तपशील बाहेर आला नसला तरीही या दोघांमध्ये मुंबई महापालिका निवडणुकीच्या संदर्भात चर्चा झालेली असू शकते. या दोघांची आजची बैठक पूर्वनियोजित असल्याचे सांगण्यात येते.

मुख्यमंत्री फडणवीस यांच्या आजच्या दैनंदिन कार्यक्रमात राज ठाकरे यांच्यासोबतच्या बैठकीचा कोणताही उल्लेख नव्हता. फडणवीस यांच्या आजच्या सरकारी बैठका दुपारी १२ वाजल्यानंतर सह्याद्री या अतिथीगृहावर दाखवण्यात आल्या होत्या. मात्र, आज सकाळी फडणवीस आणि राज ठाकरे या दोघांचाही ताफा ’ ताज लँडस एंड’ मध्ये हॉटेलात शिरला. या हॉटेलमधीलच एका कक्षात दोघांची भेट होऊन चर्चा झाली. या दोघांच्या भेटीने शिवसेना ठाकरे गट आणि मनसेच्या संभाव्य युतीला ब्रेक लागल्याची चर्चा राजकीय वर्तुळात सुरु झाली आहे.

विधानसभा निवडणुकीत उद्धव ठाकरे गटाला पराभवाचा सामना करावा लागला. तर महाराष्ट्र नवनिर्माण सेनेची पाटी पहिल्यांदाच विधानसभा निवडणुकीत कोरी राहिली. या पार्श्वभूमीवर भाजपच्या नेतृत्वाखालील महायुतीचा मुकाबला करण्यासाठी स्थानिक स्वराज्य संस्था निवडणूक विशेषतः मुंबई, ठाणे महापालिका निवडणुकीत उद्धव आणि राज एकत्र येणार असल्याची चर्चा सुरु झाली आहे. खुद्द उद्धव ठाकरे यांनी काही दिवसांपूर्वी तसे संकेत दिले होते. त्यानुसार पडद्याआड ठाकरे बंधू एकत्र येण्याच्या हालचाली सुरु असताना राज ठाकरे आणि फडणवीस यांची भेट झाल्याचे समोर आल्याने ठाकरे बंधूंच्या एकत्र येण्यावर प्रश्नचिन्ह लागले आहे.

मुंबई महापालिकेची निवडणूक उद्धव ठाकरे यांच्यासाठी सार्वधिक प्रतिष्ठेची आहे. भाजपसारखा पक्ष राज्याच्या सत्तेत असल्याने ठाकरे यांच्यासाठी मुंबईची निवडणूक सोपी राहिलेली नाही. अशावेळी मराठी मतांचे विभाजन टाळण्यासाठी दोन्ही ठाकरे बंधूंनी एकत्र यावे, यासाठी मुंबईत ठिकठिकाणी बॅनरबाजी झाली. त्यामुळे ठाकरे गट आणि मनसेच्या युतीबाबत आशा पल्लवित झाल्या होत्या. मात्र, आजच्या फडणवीस आणि राज ठाकरे यांच्या राजकीय भेटीने उद्धव ठाकरे गटात मनसेबद्दल संशय निर्माण झाला आहे.